دكتور محمد زغلة يكتب : ( شهوة ) الحديث عن فضيحة

لما تلاقى عندك ( شهوة ) الحديث عن فضيحة حد أو نشرها والتندر بيها..
بحجة
فساد الأخلاق.. وتفشي الفاحشة.. والتجروء فى المعصية.. وشوفوا وصلنا لفين.. ومفيش تربية.. ومفيش دين..
وكل واحد ياخد باله من عياله ويربيهم..!!

بذمتك انت معندكش اللى خايف منه لو اتكشف لتتفضح؟؟!!!

اوعى تفتكر نفسك (سالم)..!!
إن كنت شايف ليك الحق.. تتكلم عن (العصاة والمخطئين) وتخوض فى أفعالهم وتحكى عنها.. وتحلل سوء خاتمتهم..

أوعى تحسب.. ملكش (ذَلة).. لأ.. ليك .. !!
ووراك اللى ليه (ذلات)..
(أمك.. أبوك.. اخواتك.. ولادك.. قريبك ويمكن زوجتك كمان)
ويوجعوك أوى أوى.. لوحد عرف إن ليك قريب عمل كذا..!!

بتحسب لما تتكلم في (معصية) حد.. دة شيء سهل..؟؟!
وتقول (بصوت عالى).. لا .. دة أنا بحذر منه..!!
خلاص.. ابقى أقبل.. لما الناس تكشف ستر حد يهمك.. لما يقع فى معصية..

(سيدنا أبو بكر) بيقول (لا آمن مكر ربى وإحدى قدامى في الجنة)..

دة الصحابة .. قالوا على راجل (شرب الخمر).. (أَخزَاك اللَّه).. سيدنا النبى نهرهم: (لا تقولوا هكذا، لا تُعِينُوا عليه الشيطانَ)..
المؤمن دايماً يعين أخوه على الشيطان.. مش يعين الشيطان عليه..
سيدنا النبى بيقول..
(لا يستر عبد عبداً في الدنيا، إلا ستره الله يوم القيامة)..

(كل ابن آدم خطاء وخير الخطائين التوابون)..

إنهاردة ليك.. بكرة عليك.. (والأيام دول)..
والصالحين قالو (لو أن الولى لا يخطئ لكان نبى)..

وورد (من كان منكم بلا خطيئة فليرجمها بحجر)..

كلنا عيوب.. كلنا ذنوب.. وسبحان اللى مشينا بستره..
أوعى تتجرأ فى الخوض فى الناس..

وسيدنا النبى بيحذرنا..
(ومن تتبع عورة أخيه، تتبع الله عورته حتى يفضحه في عقر بيته)..

قال سيدى ابن عطاء الله
ربما فتح لك باب الطاعه ومافتح لك باب القبول
وربما قضى عليك بالذنب فكان سبباً للوصول !!

ونتعوذ باستعاذة شيخنا الإمام الرائد محمد زكى إبراهيم..
اللهم لا تكتب علينا ذلة .. ولا تكتب علينا فضيحة..