الدكتورة ولاء السلكاوى تكتب : ” في الصيدلية ”

بقلم: الدكتورة  ولاء السلكاوي

المريض: دكتور حاسس اني تعبان كده و هيجيلي برد (لسه مجاش حتي ) 
الصيدلي: لا متقلقش خالص ...عندي الحقنة السحرية...الي بتمنع البرد ....الي ترجع الصحه تاني ...الفظيعة...المريعة. ...الخطيرة.. و مش غاليه هاعملك تخفيض ...و احسن من كشف الدكاترة المفتريين ....و...و

المريض مقاطع و عنيه بتلمع كده: الحقني بيها يا باشا ....الحقني بيها

الصيدلي يديله الكوكتيل المعروف فقط في مصر و مصر فقط....امبول كورتيزون و امبول مضاد حيوي (ترايكسون. ديكسا)

و العيان يرتاح و يبقي حلو و ممتاز ....بس لمده يوم واحد...و تاني يوم أما مفعول الحقن يروح ....يرجع يتنيل و يسخن و يتبهدل يرجع الصيدلي..طب خد شريط فلوموكس...طب حبايتين اوجمنتين... ..و أهي ماشية يا عمي

مشهد 2 : بعد 5 سنين 
نفس العيان سخن 40 ....راح للصيدلي و خد الكوكتيل المعروف.....مهو متعود بقا .....بس المرة دي منفعش خالص....الحرارة 40 ....و مبتنزلش.....هيضطر يروح للدكترة الوحشين. ... هيعملولك مزرعة دم.....هنلاقي نوع من البكتريا.....مقاوم لكل المضادات الحيوية. ....هتتخانق معانا و تزعق. .. الحقووووووني ....هنحاول ....بس محدش هيقدر . ....البكتريا عرفت كل المضادات الحيوية و قادرة تقاومها. ...أما بناخد مضادات حيوية من غير داعي و جرعات أقل من 5 أيام البكتريا بتعرفها .... و بتتخلق سلالات من البكتريا مقاومه للمضادات ..و للأسف النهايه ....الوفاة

مش انت بس الي هتموت. ..كل الي كحيت في وشهم هيموتوا ...و طبعا ف مصر محدش بيكح ف المنديل ابدا.....الدكاترة الي بيعالجوك دول هيموتوا من العدوي أو من الغيظ منك و من عمايلك ....نهاية العالم كله هتبدا من هنا يا ناس 
شكرا لكل صيدلي عنده ضمير و مبيمشيش ورا شغل السوق....شكرا لكل دكتور مبيكتبش مضاد حيوي ف العدوي الفيروسية. ...شكرا لكل عيان بيكمل علاجه 5 أيام ع الأقل ...شكرا لكل أم مش هاريه ولادها حقن مضاد حيوي كل أما يعطسوا ....خافوا علي ولادكم ...ارحموا العيال من حقن المضاد الحيوي يا إخوانا