قصيدة «في حُب شبرا » لشاعر العامية أحمد الشامي

 

أشوفك يا شبرا في عينيًه

وشايف نفسي ف عيونِك

مكتوب عليًا ياصبية أعيش العمر مجنونِك

في أول شبرا أحلامي وف آخر شبرا إلهامي

الترعة تقول يا شيكولاني

ترُد مسرة أغاخاني

واحمد بدوي يناديني أرجع ألِف من تاني

أشوف عطارِك وحلوانِك واعيش أفراحِك وأحزانِك

تاخُدني الغُربة وارجعلِك تاخديني في أحضانِك

أحُط وداني علي قلبِك يدُق قلبي علشانِك

يا اول حُب حبيتُه وأول عِشق غنيتُه

الوِحدة عندنا عِبرة

مافيش عندنا ف شبرا دا بيتي

ودا بيته شيخنا وقسيسنا

جيران مابين فيكتوريا والدوران

وبديع وجزيرة بدران أبو وافية والشيخ رمضان

شبرا أجمل عنوان وبَر لأي سفينة

شبرا وردة في أجمل جنينة بتفرح عشاننا وتزعل علينا

ونِقسَي عليها تطبطب علينا

أدوًر عليها ألاقيها تلف الدنيا علشاني وأرجع ألف من تاني

أشوف عنوانها عنواني

يقابلني ميدان المماليك

ألاقي حبيبتي بتنادي ع الحافظية م الشبابيك

يا جسر البحر يا عوادي

ياشبرا الفن والمزازيك

من أجدادي لأحفادي

يا عطاري يا عسالي

ياسِرجة ومقلَة وتسالي

ياخلوصي بناتي ورجالي وداير الناحية مِرسالي

لأحبابي وأولادي لأجمل حب في الوادي

لفرحة خايفة تنساني وأجمل حي إنساني

وأرجع ألف من تاني وأسأل نفسي باحِبِك ليه ؟؟

مافيش فيكي حاجة ماحبتهاش

ياشبرا يا حلوة يابنت الإيه

باحِبك حُب مايتوصاش

باحِبك حُب مايتوصاش